政壇：顧汝德剩餘力量插貪曾
曾經係末代港督彭定康左右手、回歸之前做過港英政府中央政策組首席顧問嘅顧汝德，最近出書炮轟特區政府施政失誤，點名批評兩任前特首同多個政府高官，包括被指同地產商過從甚密嘅「貪曾」曾蔭權，話佢同董建華將土地控制權交咗畀地產界，不但主動放棄賣地，仲停建居屋同減建公屋，結果令私人市場不受控制，造就咗一群負擔唔起樓價及租金嘅家庭。
形容鬍鬚曾係守財奴
回歸咗都十六年啦，肥彭心戰室中堅分子顧汝德仲利用自己少許嘅剩餘價值，寫咗本名為《繁華底下的貧窮：香港施政失誤》嘅新書，仲引述咗二○○三年曾蔭權訪美時候嘅一席話，當時剛巧係七一遊行之後，嗰時仲係政務司司長嘅曾蔭權唔知道自己竟然有可能接替董建華做特首，喺美國發表講話時曾經高度評價七一遊行，當時有兩名中國外交官都係座上客。佢咁講都好配合「劇情」嘅，因為貪曾發夢都估唔到，自己竟然有機會做到特首。
顧汝德仲形容財政司司長「鬍鬚曾」曾俊華係「守財奴」，話佢守住巨額儲備唔用，令好多長者都被迫捱窮。
