政壇：大細劉現身 封口拒爆料
捲入澳門巨貪案嘅華人置業主席劉鑾雄（大劉），日前高呼被人「硬搶地」，又話被逼得走投無路後，尋日佢現身灣仔富豪飯堂食晏，又突然封口唔再爆料，對被問及澳門官司與係咪被搶地皮時，一概唔回應，真係一時一樣。尋日佢細佬劉鑾鴻（細劉）都有現身。
大劉劉鑾雄拒回應係咪被人硬搶地。
細劉劉鑾鴻早阿哥一步到達「飯堂」。
無回應是否被搶地皮
尋日中午十二點幾，大劉嘅四個保鏢首先去到灣仔嘅富豪飯堂福臨門外準備，大約一點左右，細劉同太太最先到達，其後大劉媽媽與妹妹劉玉珍緊隨其後。大約一點十五分，身穿西裝外套嘅大劉與女友呂麗君、囡囡劉秀盈坐同一架車到達。記者再度追問大劉有關澳門單巨貪官司進展如何、佢是否遭人強搶地皮時，今次大劉就選擇木無表情，對提問不瞅不睬，然後一支箭走入飯堂開餐。佢哋食飯食到兩點廿五分，就全部人一齊走。
