立法會資訊科技界議員Charles莫乃光尋日喺香港電台一個英文節目中,話CY梁振英違背當年競選特首嘅承諾,至今仍然未設立資訊及科技局,暗寸CY「走數」。尋日中午未夠十二點,CY即刻透過特首辦發聲明,話係上年有人「拉布」先會令到架構重組被推倒,到晚上Charles又再發聲明回應,唔知今朝見報時,CY會唔會再反駁呢?

設計圖片及對白

雖然尋日係星期日,但CY似乎對Charles嘅言論好緊張,專登發聲明回應,話佢一直想成立科技及通訊局,只不過上屆立法會出現「拉布」,現屆政府先未能落實有關建議,批評Charles言論與事實不相符。聲明仲話,如果再推架構重組方案,有可能重現「拉布」局面,所以短期內唔再提出有關建議,並唔係違背選舉承諾。

五司十四局重組被拉倒

老實講,喺上屆立法會就「五司十四局」架構重組嘅建議拉布時,雖然Charles仲未係議員,但泛民主派打呢場拉布戰,搞到天昏地暗,關心政治議題嘅佢冇可能唔記得。唔通佢選擇性失憶?

話口未完,到黃昏時分Charles又再反駁,佢話立法會泛民同建制兩陣營,其實都支持政府新設資訊及科技局,只不過係泛民不滿CY新增兩副司長職位,如果只加設科技局同文化局等,相信冇乜泛民反對,反批CY將兩件事混為一談。

睇嚟雙方都各有道理,但係無論誰是誰非,事到如今,就好似係蘇州過後冇艇搭咁囉!

第一手消息請下載on.cc東方互動iPhone/iPad/Android/Windows Phone Apps