香江通街窮人 貪曾禍港殃民
政府破天荒公布有史以來首個官方貧窮線，唔睇猶自可，一睇把幾火，原來本港窮人遠比想像中多，貧窮程度遠比想像中嚴重，罪魁禍首就係無德無能、愛富嫌貧嘅「貪曾」前特首曾蔭權爵士。
當局今次採用「相對貧窮」概念，以每月住戶入息中位數一半劃線，計落全港窮人超過一百三十萬，貧窮率接近兩成，即五個港人一個窮，高過之前嘅估算。有樣嘢大家一定要留意，扣除綜援及公屋住戶所得嘅福利轉移之後，貧窮人口即時少咗近半，得六十七萬幾，平均每七個人至有一個窮人。即係話，好多港人全靠公屋等福利至唔使跌落貧窮線之下嘅咋。
房屋問題係本港深層次矛盾之一，樓價近年升到阿媽都唔認得，租金亦水漲船高，有啲劏房租金按呎計仲貴過半山豪宅，連中產都大叫頂唔順，低收入「N無人士」更加苦過弟弟，公屋輪唔到，私樓住唔起，隨時冇瓦遮頭要瞓街。
公屋扶貧作用有目共睹，社會各界多年來一直要求港府增加公共房屋供應，但貪曾在位七年，一味貪威識食，增加房屋供應就歎晒慢板，問題日積月累，公屋輪候冊愈來愈長，家陣已經突破廿三萬戶。
貪曾解決房屋問題虛應故事，扶貧方面同樣一事無成咋。佢覺得人口老化係負累，社福支出係使錢，任內拒絕承認本港存在貧窮同房屋問題，更堅拒制訂貧窮線。最離譜就係，貪曾上場兩年之後，就迫不及待將前任特首成立嘅扶貧委員會解散，話委員會嘅任務已經完成喎。
叮！貪曾根本就係擘大眼講大話，公然推卸扶貧責任。香港號稱「國際都會」，老無所養，老無所依，通街靠執紙皮維生嘅公公婆婆；通脹肆虐，好多打工仔入不敷出，在職貧窮愈來愈嚴重；樓價狂飆，無殼蝸牛安居無望。貧富懸殊不斷惡化，貪曾懶扶貧，拒絕研究全民退休保障不特止，連扶貧委員會都摺埋，你話係咪禍港殃民，累人累物吖，叮！
貪曾傍富商黐飲黐食，對窮人涼薄無情，呢筆帳港人一定會同佢算清楚。前朝扶貧不力，現屆政府一定要撥亂反正，制訂貧窮線只係第一步，最緊要制訂配套措施，如果再虛耗光陰，太一叮同七百萬港人一定唔會放過你班官o架，叮！
