SUN奇古怪：SUN潮語：【劇透】
潮語「劇透」最近經常出現喺報章之上，「劇透」係「劇情透露」嘅簡寫，意思即係某啲連續劇，如果觀眾等唔切睇下一集嘅內容，就可以睇劇透頂住吓心癮先。又或者某人睇咗某套電影，然後就滔滔不絕咁向未睇嘅朋友爆晒啲劇情出嚟，連結局主角有冇死都講埋出嚟，呢啲都係「劇透」行為嘅一種。
早輪全城瘋狂地追看飛機劇，日日衝上九霄雲外，搞到香港人以為全世界機師都係何年希同Sam哥。不過張開眼睇番現實，永遠事與願違。呢套嘢開始播嘅時候我一集都冇追過，依家因為一啲原因要焗住每日睇兩次。關於劇情，當然一貫TVB式流水作業文字生產線膠製品，超現實肥皂大堆砌。不過幾位重量級演員包括Cool魔CHILAM及震宇等，其實都演得相當好，因為可以將咁爛嘅劇本演得為人津津樂道，就如把最差劣嘅食材，煮出燒鵝味道，本身都係一門學問。不過話時話，新一代嘅電視劇有一個特色，就係唔使點睇前文後理，就估到套劇講乜春，仲要每十幾分鐘一節，每節都有起承轉合，客觀結果係……隨時可以瞄兩眼，之後又可以淥兩片肥牛吹陣水，冇水吹又可以望住部電視（目及）幾（目及），追唔追都唔係問題。唔使「劇透」都知聽日大概講乜。
通常呢啲人都會被列入不受歡迎人物類別，輕則冇朋友，重則畀人打。所以，通常遇到呢類人第一件事，就係大聲喝止，「未睇！唔好講！」。不過大部分做影評嘅朋友都會好有技巧地「劇透」，做到點到即止。不過也有爛透嘅所謂電台電影節目主持。「劇透」到最後，先至懶神秘地講一句：「結局你自己睇啦！」通常聽到呢啲節目介紹嘅電影，而自己又打算睇嘅話，我會第一時間轉台算數。
如果香港近年所發生嘅事，膠官治港、社會混亂、爛仔橫行，真係衰過啲爛片。真係「劇透」，不過係「劇烈地壞透」。而最近「尖啤」夢熊大師案開審，似乎香港人繼陳振聰案之後又有一齣法庭戲碼要追，希望有人可以「劇透」些少嚟聽吓，睇吓點樣天理昭昭法？
