蘇錦樑（左）下廚煮泰式牛肉沙律，吳永嘉（右）從旁幫手。
商務及經濟發展局局長蘇錦樑（Greg蘇）繼走入官場熱廚房後，尋日更夥同中華廠商聯合會（廠商會）副會長吳永嘉（Jimmy）齊齊着圍裙表演烹飪，佢哋喺香港食品嘉年華上展示廚藝，Greg蘇即席示範炮製至愛嘅泰式牛肉沙律，又大爆當年出國留學時經常會喺學生宿舍煮番幾味拿手小菜。
至於Jimmy，尋日好小心咁喺蘇錦樑隔籬幫手搣菜，被主持人寸佢動作慢局長一截，其實佢之前已經被飲食主持蘇施黃笑佢入廚雞手鴨腳，問Jimmy係咪好少入廚，佢笑笑口話，佢係完全唔入廚房嗰隻，咁係咪太太掌廚呢？佢又好老實話：「我咁耐都係食過佢（太太）一味糖醋排骨咋！」
第一手消息請下載on.cc東方互動
