新鴻基地產前主席郭炳湘近日唔多高興,皆因佢早前向法庭提出司法覆核,話香港律師會唔接受佢嘅投訴,結果法庭前日判郭老大敗訴,仲要佢畀晒所有堂費。對於佢嚟講,堂費事小,啖氣事大,話今次點都啃唔落。

事緣郭老大不滿身為律師嘅新地非執董關卓然,喺三年前佢哋兄弟內訌嗰陣提交咗個報告貶低佢,於是咪向香港律師會投訴囉,但律師會話暫時唔會就事件展開紀律聆訊。郭老大於是提出司法覆核,要求法庭下令律師會即時展開紀律聆訊,但法官嘅裁決書就話唔會透過司法覆核干預律師會嘅決定。

雖然今次郭老大司法覆核敗訴,但律師會就改變初衷話會接受投訴。正因為咁,郭老大除咗話會再次向律師會投訴關卓然外,其代表律師仲會就今次司法覆核嘅堂費問題提出爭辯,原因係律師會改變初衷話可以接受投訴,法庭先至決定唔需要進行司法覆核,所以堂費應由律師會支付咁話。

第一手消息請下載on.cc東方互動iPhone/iPad/Android/Windows Phone Apps