政壇：立場無定向風 阿Paul變麻煩友
立法會係政治角力場，各具背景嘅議員亦大致分為建制派及反對派兩大陣營，不過，議會中向來都有幾個人立場古怪，好似九東嘅謝偉俊（Paul）咁，尋日佢位於牛頭角下邨嘅辦事處開幕，政務司司長林鄭月娥同立法會主席曾鈺成應邀出席做嘉賓，佢哋不約而同借致辭寸阿Paul，對佢係咪建制派一員大感懷疑，睇嚟阿Paul已經憑佢嘅無定向風，成為議會嘅新麻煩友。
設計圖片及對白
失驚無神「遺憾」政府
林鄭月娥同曾鈺成尋日好似唱雙簧咁，明言阿Paul無論喺立法會定係對官員都係「無定向風」、「無法子知佢係邊一邊」，林鄭直言阿Paul「好難搞」，仲爆料話，曾經收到有負責游說阿Paul支持政府政策嘅同事反映，「乜佢（Paul）唔係建制派咩？點解要花咁大努力先可以攞到佢一票？」又話阿Paul喺立法會成日都係最後一個發言，除咗令曾鈺成唔耐煩外，官員都好怕佢嘅「無定向風」，失驚無神整個批評，甚至「遺憾」吓政府。
跟住輪到曾鈺成打蛇隨棍上，佢話阿Paul係其中一個令佢驚驚嘅議員，又話如果同阿Paul同一陣營嘅話，就可以見到佢好似一名悍將咁，將對手逐個KO（擊倒），但如果同阿Paul對陣就會好「論盡」，因為唔知佢會開邊瓣、企邊一邊咁話；佢哋揶揄阿Paul嘅說話搞到大家都忍唔住笑，似乎阿Paul喺議會左一刀、右一刀，令林鄭同曾鈺成都好頭痛。當事人阿Paul對佢哋兩個嘅致辭表現得好淡定，仲話議員要有專業判斷同立場，唔能夠一味偏左或偏右喎。
