唔經唔覺,強積金實施咗十三年,喺呢段漫長歲月裏面,打工仔積咗幾多金呢?講起就得啖笑,強積金百孔千瘡,問題多多,打工仔任人魚肉,金就積唔到嘞,帳戶反而積咗一大堆,唔知好笑定好嬲!

強積金帳戶究竟有幾多呢?唔講唔知,截至本年八月,個人帳戶總數高達四百五十二萬個,較○七年激增八成四,即係平均每人持有一點七個戶口;當中持有四個或以上帳戶人士激增兩倍至十八萬人,最誇張係有人同時擁有三十二個帳戶,問你服未。

強積金回報愈來愈低,但戶口就愈積愈多,白白養肥咗基金經理,打工仔唔谷氣就假。所以咯喎,積金局急急補鑊,提醒打工仔帳戶愈多愈難管理,管理費亦愈多,隨時得不償失,準備向打工仔發信,要求整合帳戶喎。

嗱,都話港產官僚高高在上,同一般打工仔活喺兩個不同世界o架啦。一般打工仔點識得整合強積金帳戶吖?係人都知,轉移強積金戶口手續繁複,選擇花多眼亂,打工仔就算有時間,都唔知點揀啦。計太一叮話齋,港產官僚如果真係為打工仔嘅退休生活着想,應該做嘅係取消強積金,推行全民退休保障,而唔係一味小修小補,敷衍民意!

唔講猶自可,講起把幾火。強積金實施十三年,畀人鬧足十三年,官老爺唔大刀闊斧撥亂反正,一味修修補補掩人耳目,一時話「半自由行」,一時話收費封頂,一時話整合帳戶,全部不切實際。呢,有工會分析發現,強積金表現差劣,按五年期計算,近九成基金回報低於通脹,你話係咪搵嚟搞吖?事實證明,強積金已經淪為一個穿窿筲箕,補無可補,徒招民怨,如果再唔撥亂反正,唔止打工仔嘅血汗錢付之流水,港府僅有嘅丁點民望亦遲早付諸東流嘅咋。

話時話,強積金唔只係穿窿筲箕,直頭係計時炸彈添。正如有人話齋,呢個劫貧濟富嘅搵笨制度根本就係英國人留低嘅政治地雷,目的係攪亂香港。北大人成日話防止外國勢力干預香港事務,係咪應該提醒港府唔好再抱殘守缺呢?你知啦,打工仔被強積金靠害,不斷累積嘅唔止係帳戶,仲有怨氣,遲早搞到民怨爆煲,到時後悔就遲喇,叮!

第一手消息請下載on.cc東方互動iPhone/iPad/Android/Windows Phone Apps