城中鏡：黃進達甜蜜婚照「泰」正斗
尋日係康泰旅行社董事總經理Jason黃進達同女友Tania陳婷婷結婚嘅好日子，夜晚筵開百席大宴親朋。遊遍全世界嘅Jason，結婚不忘工作，廣發早前喺泰國同韓國拍攝嘅甜蜜婚紗照，以行動軟銷去外地搞婚禮係有幾咁正斗。
黃進達同陳婷婷喺海邊長堤上甜蜜合照，夠晒浪漫。（受訪者提供）
黃進達（右）婚禮上感謝爸爸黃士心（左）多年來悉心栽培。
Jason話籌備婚禮過程中，發現唔少準新人都嚮往有新鮮感同獨一無二嘅婚禮，但飛去外國行禮，人生路不熟，頭痛到極，所以佢月前就諗到為準新人提供一站式海外婚禮服務。佢大讚陽光與海灘嘅布吉，行禮最正，自己親身同太太示範對住藍天碧海擺甫士，仲騎住大象遊原始森林，果然有劇照效果，夠晒落力。
講番尋晚嘅婚禮，數百政商、飲食、旅遊界名人到賀，Jason致辭時感謝父母嘅悉心栽培，自細教佢要刻苦耐勞，三更半夜捉佢起身家訓，培養佢長大後習慣咗超時工作。不過，爸爸黃士心就話Jason細個經常「百日哭」，搞到佢同太太無得瞓。跟住Jason就向新娘子Tania「沙冧」，話自己經常離港公幹，就連籌備婚禮都無時間，但Tania都無半句怨言，感謝太太嘅包容喎!
