城中鏡：慢必 何建宗 餐廳僻位傾密偈
喺兩個月前，發展局前政治助理何建宗被揭未有向政府申報其家族公司持有新界古洞逾兩萬呎地皮，佢喺一日內閃電辭職問責，成為梁班子中第一個離職嘅政治助理，簡直好似黑旋風咁。不過，佢辭任政助後，似乎未如外界所料幫手打理家族生意，而係不斷搵昔日好友出來歎tea打牙骹。
何建宗（右）主動約「慢必」陳志全（左）敍舊，唔通想訴苦呻政府好難做？
兩人不時傾到指手畫腳。
前日下晝兩點半鐘，咁啱喺金鐘一間酒店Coffee shop發現何建宗同人民力量嘅立法會議員「慢必」陳志全坐喺一個偏僻嘅角落，期間傾到雞啄唔斷，何建宗仲不時指手畫腳，而慢必就不時點頭回應。佢哋傾咗個多鐘頭後，慢必就找數離開，仲一齊入咗洗手間，但之後眨吓眼就唔見咗人喇，可能係搭升降機離開酒店。
忽然熟番約見面
據講，何建宗同慢必當年係中大社會學系嘅同學，但就未聽過慢必話同佢好熟，忽然間約慢必出嚟敍舊，究竟所為何事呢？我哋問過慢必，佢話大家多年來都冇乜聯絡，但幾個星期前，何建宗主動約見面，當時都有少少驚訝，但都爽快應承。
佢哋當時傾緊乜？慢必就三緘其口，只係話當日係朋友敍舊，總之天南地北乜都傾一餐。究竟何建宗離開政府呢個熱廚房後有乜新搞作呢？莫非搵慢必做佢家族公司旗下產品嘅代言人？究竟係殺蟲水定係神油呢？
