SUN搞作：打橫嚟講：打救民望特首盃
香港大學民意研究計劃發表民調報告，指特首梁振英放假期間，港人對香港特區的信任程度大幅攀升，回復到半年前的水平。
在此之前，特首為做靚個親民形象，除了不斷冒險落區與廣大群眾「零距離接觸」外，更責成頭號親信、中央政策組首領邵善波度橋，即使無假放，民望都要節節上揚。
邵大叔想出繼賽馬外，另搞一個踢波「特首盃」，吸引全港七百萬人參與咁話。你估係英超歐聯咩？連本地足總主席亦立刻撲出嚟潑冷水，因怕本地足球場被搗爛囉！
香港廢柴政府養埋一大堆垃圾低能兒，點會有好橋吖！本人是個超級愛港優良分子，為了香港好，定必竭盡所能，拋出絕世高橋，打救吓佢啦！
嗱！搞「特首盃」比賽是個不錯的點子，只要有噱頭便是囉！踢乜春波咁辛苦吖？喺學校搞語言藝術的「鬥噏」（煲呔語）辯論咪算囉！題目係：「老師廿四小時唔准講粗口，咁特首可唔可以呢？」喂！又可以玩「大富翁霸地起樓」大賽，見縫插針盲搶地咪得囉！仲有，最好的，都係同飲食有關嘅！嗱！千祈咪搞跟老廉過氣高層鬥飲茅台喎！而係要有創意無限的「涼粉漂白」益智比賽，如何以最科學方法，將「黑」變「白」。若沒常識頭腦者，可以玩「切涼粉」大比併，賽例係用屯門金毛牌西瓜刀「切」涼粉，「切」好嘞！唔准「劈」o架！以限時之內，切得最多最細粒嘅，便算勝出，攞個盃歸家祭祖威威！包保全港係人都參加比賽。
特首盃開鑼日，再請番林鄭出嚟造勢，讓特首繼續放假，包掂！民望一定升爆燈！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
