SUN搞作：少膽虫手記：福伯vs維園阿伯
少膽虫前排聽美帝領事「下籤福」宣讀聖旨，福伯大聲疾呼「美國會繼續為香港普選發聲」，心頭大樂，諗住回稟腦細淫賤黎，想話《爛果》仲有得做、條水喉唔會閂住啦，點知會場中突然有人大叫……
「福guy！正一福guy！」維園阿伯拎住自製膠樽大聲公怒罵福伯。「毫不悔改、一意孤行！赤裸裸干預香港政制發展問題，因住落得不光彩嘅下場！」
「Nonono……」福伯氣定神閒，「我哋唔係赤裸裸，我哋披咗件民主嘅外衣。你睇吓你阿爺，寧要原子，不要褲子，先至係赤裸！」維園阿伯頓感語塞。
「福伯講得好！」少膽虫此時忍唔住加把嘴：「美國人去到邊都係講呢一套豉油民煮法事嘅價值觀o架啦！」只見福伯望向少膽虫，輕輕點頭，以示嘉許，於是少膽虫有恃無恐繼續話：「譬如好似沙特阿拉伯呢啲親美專制王權咁，美國都係得個講字，邊會特登干預你？」少膽虫正自得意，回頭卻驚見福伯目露凶光。
「哦！你咪係《爛果》腦腫少膽虫？」維園阿伯見到福伯同少膽虫眉來眼去，看出端倪。「一早知你係帶路黨喇！你腦細收咗幾多美金？講！」
「壹全霉無收外國勢力嘅錢，」少膽虫小心翼翼望實福伯，希望唔會再講錯嘢：「因為淫賤黎根本就係英國人！」福伯當堂暈低，口吐白沫，手執籤文，心中想着：「原來之前去洪聖古廟求嘅下籤，鬼咁靈……」
