政壇：鄧家彪硬撐個人遊
新民主同盟立法會議員范國威早前投訴個人遊旅客攻陷香港，要求政府取消一簽多行同收回單程證審批權。尋日工聯會轄下四個同旅遊業相關嘅工會就來個大反擊，舉出數據話個人遊對香港經濟有莫大裨益，叫大家應該正面看待內地旅客。工聯會嘅立會議員鄧家彪話，反對個人遊嘅言論好似「舊移民歧視新移民」咁，其實理性啲看待問題，只要將內地旅客分流去離島等無咁擠迫嘅地方，對香港就係雙贏局面。
設計圖片及對白
倡分流離島購物
其實，喺范國威叫政府收口單程證審批權，當時政務司司長林鄭月娥都話，內地新移民來港嘅單程證審批係有憲法基礎，好多係一家團聚，政府唔應該將人哋拒諸門外。尋日工聯會旅遊業、百貨商業、飲食業同酒店及餐飲業四個屬會反擊范國威嘅講法，話香港旅遊相關行業聘用約六十二萬人，佔全港六分之一，係香港嘅經濟支柱，而個人遊開放以來，香港零售業總銷貨值由一千七百億元增加到四千四百億元，酒店十年間增加一倍到二百一十七間，希望港人睇吓個人遊為香港帶來嘅好處。咁講，即係叫某啲人，唔好講到個人遊搞到香港陸沉咁喇！
鄧家彪話，好似港人鍾意北上購物咁，其實好多珠三角地區嘅居民，都係因為經濟原因來香港買吓日用品，而香港亦唔係無承受能力，只係內地旅客堆晒喺鐵路沿線。身兼離島區區議員嘅佢就覺得政府做好嘅基建，將內地客分流去大嶼山等地區購物，就唔會出現擠迫嘅問題，仲可以發展到偏遠地區嘅經濟添。
佢仲話內地《旅遊法》實施之後，來港嘅係更高質素嘅旅客，冇理由將人拒諸門外喎！
