中國政府終於沉不住氣了！看見中共外交部發言人洪磊氣急敗壞、兇巴巴地聲討英國外交國務大臣施維爾（Hugo Swire），因這鬼佬喺香港報章撰文話「（有關香港普選）隨時準備提供任何支援」。之前也有西環小頭目「面斥」美國駐港總領事夏千福「干涉香港內政」！

香港《基本法》明文寫實「一國兩制」下，除「國防」和「外交」外，一切由港人自治（即自理也），現中共政權毫不遮掩下出口出手，即擺明今劑唔係「地方性」的小問題，而係關外交事務啦！咁！又奇怪嘞！香港普選，乜唔係港人自治的香港事咩？幾時上升到「國家大事」嘅層面嘅？

好！講番轉頭，英美鬼頭喺香港特區「食叉燒、拜文武廟」，兼又「投稿幫助香港」，都係好低水平嘅政治行為啫！反正，全球有邊個國家無畀人「落咗釘」（有特工潛伏），同派兵到別國「插旗」的吖？係人都知，香港一直都有「外國勢力」喺度搞搞震o架啦！無至出奇啦！

政治角力拉扯比併，係講謀略，鬥智打力的！傻仔至爆響口，八婆嗌交的吠叫！

香港人唔係傻嘅！邊個對我哋好！咱們心中有數！其次，睇吓呢個香港廢柴政府的問責官員，唔係面目巖巉，就係行為低能騎呢！家陣，仲PK到無面見人，淨係在黑角裏做「鍵盤戰士」，嗱！早兩天的星期日，政府高層就有三件以網誌吹風當做咗嘢，包括財爺鬍鬚曾撐「樓市辣招」；廢柴陳茂波龜縮轉談「保育歷史建築」；梁振英在網頁話「落區一次好過一次」，惡唔惡心吖？如果，外國勢力還比中央或香港特區廢柴政府更得港人民心，咁就唔係搵個嘍囉睜眉凸眼的慘叫，而係自省點解咁趴街失敗囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps