SUN搞作：少膽虫手記：源頭濁水
今日少膽虫百無聊賴，腳甲都就快要剪到甲溝炎兼順手攞病假喇，都未有嘢要做。忽然人有三急，就入廁所打個尿震啦，點知一入去，竟然見到淫賤黎企喺尿兜前，雙手放牆上，一臉痛苦。
「少……少……」淫賤黎面青口唇白，呻吟道：「少膽虫，無水喇我！」少膽虫一諗，無理由吖，十九才子呢排抽王菲離婚嘅水，邊會抽埋自己主子先得？於是試探一問：「唔係吖，腦細你細水長流啫！你又白鴿又教會咁多瓣，個個都睇住你支水喉啦，點會有事喎？」「錯錯錯！」淫賤黎突然發誨氣：「問渠哪得濁如許？惟有源頭泵水來！我只不過係渠咋！」
「腦細唔好講笑啦，如果你係渠，咁一定係大明渠啦！」少膽虫雖然唔係好明，仍把握機會擦鞋：「你聞吓你胳肋底陣銅臭味，一定臭過明渠呀！」淫賤黎怒氣衝天，轉身正對少膽虫大聲鬧：「講極你都唔明！我就快無得做美帝代理喇！」
「吓！國師話美帝走狗要落地獄！」少膽虫面有菜色：「咁我係美帝走狗隻走狗，點算？」
「太公報話美帝唔使我哋，佢自己出手喇！」淫賤黎嘆氣：「龜依家都無得上『Ｘ天堂』啦，做過美帝代理落地獄，又有乜好怕喎？」
