城中鏡：楊惠妍再膺中國女首富
內地經濟騰飛，有錢人急增，但巨富榜排名卻大同小異。《2013胡潤女富豪榜》顯示，一向低調嘅碧桂園創辦人楊國強千金楊惠妍相隔五年再登榜首，今年三十二歲嘅佢，已經有五百一十億元人民幣財富，力壓舊年居榜首嘅龍湖地產董事長吳亞軍。值得一提嘅係，楊惠妍有米得嚟都好有善心，佢喺《2013胡潤慈善榜》中，以過去一年捐一點一億元人民幣，成為女富豪榜中的首善，攞咗兩個第一。
揸住逾半碧桂園股權嘅楊惠妍成為女首富兼最善心女首善。圖為她結婚時的照片。（資料圖片）
楊升榜首，皆因吳亞軍同丈夫蔡奎舊年證實離婚，原本兩人喺龍湖合共七成嘅股權亦要分割，吳亞軍身家自然少咗一截，撞啱龍湖今年嘅股價亦大幅滑落近14%，身家自然又要縮。至於楊惠妍，佢依家揸住碧桂園逾半股權，而且隻股今年仲升咗超過25%，楊惠妍身家自然水漲船高。此消彼長之下，吳亞軍中國女首富之名就惟有拱手讓畀楊惠妍喇！
