城中鏡：洪為民驚嘆「愛國」IT奇才多
香港人算係好鍾意旅遊嘅一群，但對愛沙尼亞嘅認識恐怕都唔多。互聯網專業協會會長洪為民（Witman）早前以中國代表身份，飛去愛沙尼亞出席聯合國世界訊息高峰論壇大獎，擔任評審。初次遊「愛國」，佢就有唔少發現。
洪為民（右）日以繼夜審閱參賽作品，睇到眼都花。旁為來自科威特的靚女評審員。（被訪者提供）
Witman發現當地IT奇才多，唔少IT人「食腦」創業，其實愛沙尼亞人口唔算多，但極之重視IT文化，Wi-Fi被列為人權一部分。佢發現無論係餐廳定酒吧，餐巾上都印有Wi-Fi密碼，唔使消費者主動查問，最正嘅係當地政府善用科技提升市民生活質素，例如有市民嘅車牌到期，當局就會發個電郵提示你，車主只要喺網上按幾個掣辦理就搞掂，快過香港多多聲。因為IT風氣盛，年輕人慣咗食腦，仲識利用IT科技開公司賺大錢，唔到你唔服，結果小小「愛國」成為全世界人均創業人數最高嘅地方。
