城中鏡：方文雄盼華軟硬皆輝煌
城市大學日前頒授榮譽院士畀幾位城中傑出人士，以表揚佢哋為追尋理想而不懈努力，及對社會嘅貢獻。全國政協委員方文雄（David）係其中一人，佢出席頒授典禮上時講到中國嘅軟實力，佢話自己嘅理想係要改變外國人對中國人普遍欠佳嘅印象，希望中國嘅「輝煌」成就不會只流於硬件嘅建設。
魏華星（右一）獲榮譽院士，太太Liyen、囝囝、囡囡都好高興。
方文雄（右二）獲城大頒授榮譽院士，爸爸方潤華（左二）、太太Cecilia（右一）同囝囝方添輝（左一）齊齊慶賀。
陳曼琪成為榮譽院士，夫婿阿Ken亦與有榮焉。
David話，中國近來無論科技同經濟都突飛猛進，只可惜「輝煌」成就只流於硬件建設，軟實力仲係十分落後，令佢感慨良多嘅係內地經常出現黑心食品、環境污染，同埋觀光客種種失禮行為，上述種種實在令中國人蒙羞，而外國人對中國人嘅態度，亦只繫於「睇錢份上」嘅層次。故此中國人若要真正得到外國人尊重，非要大舉建設文化不可。David話假如有朝一日，中國帶領時裝同音樂嘅潮流，咁至稱得上強國盛世。
另一位獲頒榮譽院士嘅係「Green Monday」創辦人之一魏華星（Francis），Francis話以商業手法嚟解決社會問題，以及鼓吹素食嘅潮流，以往大家不但覺得難以想像，仲會認為意念瘋狂，然而只要堅持理念，舊時被喻為小眾嘅想法就會為大眾所接納。
一眾精英之中，黃大仙區議員陳曼琪係唯一嘅女士。以律師為本業嘅佢，話普羅大眾都以為律師嘅收入好高，其實事務律師嘅標準收費受司法機構所限，九七年至今未曾更改。身兼中小型律師行協會會長嘅陳曼琪，現時目標就係為同行爭取合理嘅標準收費。
