政壇：波波累林鄭「寸步難行」
發展局局長陳茂波（Paul）早前喺網誌撰文，疑為發展郊野公園「試水溫」，直到尋日先現身一個酒會，面對一擁而上嘅記者佢一言不發，離開時仲因為大批人圍訪，累及早佢少少離開嘅政務司司長林鄭月娥都寸步難行。
陳茂波（藍箭嘴）被圍困，連累林鄭月娥（紅箭嘴）。
香港潮屬各界尋日舉行酒會，港府多名問責官員都有出席，被追問「郊野公園論」，阿Paul全程一言不發。相比阿Paul寸步難行，喺台上同佢並排而站嘅食物及衞生局局長高永文喺酒會後留落嚟，在場人士爭相同佢拍照留念。當問及同屬潮籍嘅阿Paul為何早走，高永文話對方可能有事要做，又否認高民望先可以留低，笑稱大家唔好大驚小怪喎，隨後有人發現高永文剪咗頭髮，佢問大家係咪剪得太短，所以覺得好笑喎。
