位於沙田石門嘅鄉議局大樓，落成只有兩年幾時間，呢座花費兩億元嘅建築物外表美輪美奐，點知豪華裝修設計不周，搞到大樓要不斷撲水做維修工程。大樓前年試過因漏水要換地板，最近又話要花十一萬元，換過晒啲LED慳電燈膽同加裝閉路電視。

新大樓嘅會議廳、大劇院同禮堂依家不時出租畀其他團體使用，對上三個月出租率更愈來愈高，但大樓內嘅設施損壞率亦愈來愈高，例如有啲團體用完鄉議局個場後，入面好似打完仗咁，啲枱枱櫈櫈爛晒，但口同鼻拗好難話邊個唔啱，惟有建議大樓喺唔同盲點安裝十三個閉路電視，單係呢筆費用預計要近八萬蚊。咁都未算，近排仲要再科水兩萬七千蚊，用嚟將大禮堂天花板嘅燈光設備換做LED慳電燈膽，據講當年設計有嚴重漏洞，舞台射燈一旦長開，既容易報銷亦勁浪費電力，搞到鄉議局每個月用喺射燈嘅電費高達三千蚊。嘩！新大樓用咗兩年，已經咁多維修、折舊，唔通呢啲就叫豪華唔代表實用？

第一手消息請下載on.cc東方互動iPhone/iPad/Android/Windows Phone Apps