政壇：易志明正生如廁唔怕臭
正生書院側嘅碼頭先天不足，吹西南風嗰陣船隻好難泊岸，更可能觸礁。立法會議員易志明尋日到場了解碼頭嘅改善、擴建需要，來自航運交通界嘅佢搭船嗰陣完全無暈浪，點知原來佢仲有「泰山崩於前而色不變，糞味飄空中而笑滿面」嘅風範。
易志明尋日參觀正生書院嘅校舍，亦試用嗰度嘅臨時廁所。
話說易志明睇完個碼頭後就順便參觀正生書院嘅校舍，期間發現校舍對上郊野公園有幾舊疊起嘅巨石。校長陳兆焯話問過政府，對方只表示無即時危險，易志明仲叫在場記者淡定啲添。另外，正生校舍無正式廁所，全校近百師生「共享」十二個臨時廁所，每個都好易滿同好臭，隔日要清理。不過易志明就冇有怕，臨走前傲然脫下西裝褸，走入臨時廁所時大笑話「等我試下個廁所臭唔臭先」。
正生書院之前用街渡接載師生被檢控，雖然有人話會捐船畀正生，但至今仍未落實。自由黨基金早前承諾出錢租船三十日幫拖，易志明就話若果正生嘅租船安排仍未有着落，會再同基金委員會討論能否延長協助。
