政壇：鄭耀棠評分低絕行會
針對本地政圈人士嘅表現，有機構定期舉行十大立法會議員及五大行政會議成員嘅調查，結果雖然未必反映參政者嘅政績，但從中亦睇到唔少問題，捲入負面消息者更往往無所遁形。好似啱啱公布嘅五大行會成員榜，久未登榜嘅工聯會鄭耀棠竟然一躍成為第五，評分係四十一點六分，總結排名更係行會包尾。按調查舉行時間嚟睇，鄭耀棠上榜同早排被揭發帶埋老婆大模廝樣坐國泰機豪遊法國有關，而佢事後唔認錯、唔回水嘅態度亦反映咗喺評分上喇！
設計圖片及對白
香港大學民意研究計劃尋日公布咗新一份有關行政會議成員民望嘅調查報告，今次調查於九月九日至十二日之間舉行，十四名行會非官守成員入面，為人最熟悉嘅五大成員中，除有以往都經常上榜嘅行會召集人林煥光、羅范椒芬、李慧琼及葉劉淑儀外，今次竟然有鄭耀棠份。
拒捐錢息質疑
過去由於知名度嘅關係，鄭耀棠榜上無名，但上個月被踢爆接受國泰款待豪遊法國參加收機團嘅人士中，只有鄭耀棠一人係行會成員。
事後唔少參加活動嘅立法會議員都決定回水或捐款，避免被質疑接受款待，但喺政界打滾幾十年嘅鄭耀棠至今未道歉、唔認錯，更加莫講捐錢平息質疑喇！
或者鄭耀棠因豪遊一事備受關注，喺市民熟悉嘅行會成員中跑出，但評分就只有四十一點六分，分數之低係今屆行會成員之冠。雖然話呢個調查要篩選走一啲市民好唔熟悉嘅行會成員，但出身工會嘅鄭耀棠得分之低都足以響起警號。
