剃人頭者被剃頭 官員議員一般醜

係咁嘅，有市民成立公職人員誠信關注組，呼籲社會各界一齊監察立法會議員同政府官員嘅操守問題。嗱，講到誠信破產，官場代表梗係「絕代雙貪」前特首曾蔭權爵士同前廉政專員湯顯明啦，咁代議之士嘅反面教材又係邊個呢？關注組雖然冇點名，但畫公仔唔使畫出腸，班政客平日企喺道德高地狠批高官，自己卻其身不正，醜聞多多，所以咯喎，關注組要求立法會議員先正己而後正人，仲向議員發問卷，要求表態係咪支持收緊利益申報制度添。

唔知好嬲定好笑，立法會職責係監察政府，結果因為其身不正畀人監察番轉頭，呢啲咪叫剃人頭者，人亦剃其頭囉。講真，身正不怕影子歪，如果議會政客唔係咁不知自重，都唔會搞到咁狼狽不堪啦。佢哋一邊指摘高官僭建，一邊自己大肆僭建；一邊炮轟高官利益輸送，一邊將立法會議員泊車位私相授受，明益自己友；一邊義正詞嚴追殺高官瞞報利益，一邊自己卻不斷鬧出瞞報、隱報、漏報醜聞；嗰頭聲嘶力竭怒斥港府官商勾結，呢頭自己卻接受財團款待豪遊法國。有口話人冇口話自己，你話呢班政客係咪虛偽吖？係咪腐敗吖？

所以話，如果港府係千瘡百孔嘅爛蘋果，立法會就係腐敗不堪嘅籮底橙，議會政客平時大義凜然批評高官，只不過係五十步笑一百步嘅咋。稍稍唔同嘅係，高官如果尋花問柳斷正，下場必然鞠躬落台，但係有政黨成員叫雞斷正，居然輕描淡寫，當乜事都冇，問你服未。

古語有云，其身不正，何以正人。各位尊貴議員，你哋咁嘅表現，仲點有資格擔負監察政府嘅神聖使命呀？仲點有顏面面對投咗你哋一票嘅選民呀？唔好忘記，議會政客除咗誠信有虧之外，嗰啲爆粗掟蕉、唯恐天下不亂嘅搗亂行徑一樣咁乞人憎！

難為議會政客仲成日話爭取民主喎，如果唔躬身自省洗心革面，就算有普選都冇用啦，咁嘅道德敗壞爛蘋果籮底橙貨色，市民點揀得落手呀？

講多無謂，食多會滯。為免再爆出利益衝突醜聞，申報制度必須收緊，各位議員仲有少少羞恥之心嘅，唔該快啲回覆關注組，之不過咁，講得出要做得到，如果又係信口雌黃，自欺欺人，立法會嘅誠信同民望必定低過AV女星條事業線o架，叮！