旅發局，你班諸公諸婆究竟知唔知乜嘢係環保o架？今年中秋，旅發局搞咗個甚麼「綵燈大觀園」嘅設計比賽，「金獎」係那個名為「悅滿中秋」嘅巨型物體，它用咗七千個塑膠空樽，每膠樽內安裝一盞LED燈，砌咗半球形「綵燈」，聳立水池上，以電腦控燈製造變色效果，這等「小學雞」設計，仲誇耀到乜春「月圓月缺」、「流星雨」效果，真噴飯！

利用空樽設計造型的裝置藝術，全球不知搞了多少年、多少款式。哦！中秋咪半月形，加水倒影，成功爭取「滿月」囉！哈哈！端午可砌半隻糉，加水影，咪又全隻囉！有乜特別呢？請問？

呢個旅發局話此「金獎」作品，係「帶出環保訊息」，主要源於整個展覽完結後，所有廢棄膠樽會回收，砌完再用！係吖！一班本地年輕設計師的創作意念，係利用塑膠空樽做裝置原材料吖！此本應以「用過的空樽」呀！咁先係「環保精神」呀！但現今，我哋喺維園見到的那「金獎」的所有膠樽，隻隻都係「新造」的呀！大佬！

環保概念ABC，最基本係「不再要製造廢物垃圾」，即「源頭減廢」；其次，無可奈何的現實中，一定有垃圾o架啦！我哋咪要想辦法，廢物利用，循環再用呀！怎會似旅發局咁樣！偷換概念，以「環保」之名，先生產未來的垃圾o架？

仲有呀！每個樽裏的LED燈，本來可用幾萬小時的，家吓，只用幾日就淪為垃圾？據知，每次政府用呢款「慳電燈」做完騷之後，卻無人處理，劑劑製造大量有毒廢料，咁就叫「環保」？我呸！

嗱！當大家到維園「賞月」時，請記得政府又再講大話愚弄香港市民呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps