SUN搞作：少膽虫手記：退休的小明
自從獻賤招炒人之後，少膽虫望住班《爛果》同事咁鬼忙，自己又幫唔到手，惟有喺個位唱吓歌、剪吓腳甲咁。「又un又搖撬兩撬……」少膽虫一時唱得大聲咗，發現全層樓嘅目光，都落喺少膽虫度。
「少膽虫！你唱埋啲咩淫歌？即刻同我入房！」唔使問，梗係淫賤黎出聲。少膽虫一入去就慌忙辯解：「唔係呀！係飲歌！」淫賤黎一腳踢在少膽虫肚上，大罵：「你咁多淫念，做乜唔落手做單動身淫？」說罷少膽虫股上再中一掌。「冤枉呀！腦細我只不過係想幫你撬啲勁人過嚟《爛果》咋！」少膽虫屁滾尿流，不住哀求。
「講吖！你講唔到邊個，我就搵你去派《喪報》！」少膽虫一諗起要再去堆填區執骨，個人即刻醒爬：「傻仔明呀！係囉，咪係傻仔明囉！」淫賤黎奇問：「佢識唔識搞全霉o架？」「全霉嘅嘢，做兩年就識啦！」少膽虫豪言壯語，繼續發表：「創業難，守業更難，傻仔明就最叻把關，佢仲啱啱退休，大把時間幫你睇住！」
「有咁嘅人？」淫賤黎將信將疑：「我咁有野心，其實都幾需要有人守護我，一攻一守，其樂無窮呀！」少膽虫見擦正對鞋，舒一口氣：「係呀，咁出色咁忠心護主嘅員工，依家好難搵！」淫賤黎點點頭：「咁佢究竟係邊個？」
「哦，佢好似叫湯顯明！」
