城中鏡：曹博士科學角度寫食經
每逢有涉及科學嘅事件，好似有立法會議員在會議廳放氫氣球抗議，以致平價香薰殺入香港等，傳媒經常搵生物化學專家曹宏威博士從科學角度解釋吓。不過原來曹博士早年曾寫過影評，近年連食經都寫埋一份添！
曹宏威百足咁多爪，研究科學之餘又寫過影評同食經。
曹博士舊年棄選港區全國人大代表換屆選舉後，最近又有新搞作，講緊嘅係加入食家行列。佢話至今已經寫咗三十幾篇食經，有關食經嘅內容都係從科學角度出發，例如有關食物有乜營養成分，點樣煮法先會最有營養等。
除咗食經外，佢早於八十年代末仲寫過影評，舉例話好似睇到有場戲係關於羅馬鬥獸場，究竟當中有乜科學知識，就係佢嘅關注所在。
當問及點解近年未有見佢再寫影評，佢自有一套，承認佢嘅心態係「到此一遊」，之後就繼續試其他新嘢喎。究竟百足咁多爪嘅曹博士下次又會走入邊個新領域，相信佢一日唔揭盅都無人會估到。
