城中鏡：名媛熱談龜苓膏
近日本港有品牌懷疑出售問題龜苓膏，經化驗後更被質疑「龜苓膏冇龜」，觸發市民恐慌及退款潮。尋日喺沙田馬場遇到太子珠寶鐘錶執行董事Joseph朱繼陶同太太朱鄧麗萍，朱太話多年前已幫襯該店，亦有購買現金套票，依家暫時都唔食喇。
朱繼陶（右）夫婦日前孖住睇艷舞，大呼過癮。
董吳玲玲（中）有大仔董必成（右）同細仔董必政分別幫手打理印刷及珠寶生意，大可安心湊孫。
黃永幟話會繼續幫襯懷疑出事嘅龜苓膏店，認為今次只係惡作劇一樁。
養生有道嘅朱太話食龜苓膏除咗想清熱排毒之外，亦當食甜品止吓口痕，家陣事件真相未明，惟有食生果同燕窩頂住先。Joseph透露，兩夫婦早前出席一個慈善活動，觀賞咗一套國際著名嘅艷舞，大呼過癮。佢笑住叫大家唔好諗歪，事關佢只係喺藝術嘅角度，欣賞表演嘅編舞同特效而並非睇裸女。朱太就話舞蹈中表演軟骨功嘅男性，比裸女更吸睛喎！
幟哥料惡作劇
帝皇翡翠行政總裁董吳玲玲都喺度，同老公董中浩、大仔董必成及細仔董必政齊享家庭樂。注重健康嘅董太話，因工作繁重經常捱夜，老公就會到荃灣一間老店買龜苓膏畀佢滋補吓。不過，佢話呢類食品只可視之為輔助健康食品，要調理身體，佢始終都會去睇中醫執番劑中藥。
名廚黃永幟就話每月都會食一、兩次該店嘅龜苓膏，將來會繼續幫襯，相信今次事件只係惡作劇。佢話龜苓膏主要作用係清熱，可以進食羅漢果、涼草粉等食物代替。海皇粥店執行董事蕭楚基就話，一向都唔信龜苓膏聲稱嘅藥效，唔食就一定冇事喇。
