設計圖片
雖然外界成日批評功能組別係小圈子選舉，但功能組別嘅競爭激烈同權鬥程度。四大商會之一嘅廠商會，其議會代表林大輝唔經唔覺已做咗兩屆，傳聞佢一直想到新界東轉戰直選，所以一班廠商會中人都積極搵緊接班人，不過，最近情況有變。
過去一年，由於不時傳出大輝會跳出功能組別，轉戰直選嘅風聲，所以廠商會內部亦有唔少人蠢蠢欲動，希望頂替大輝空缺，例如上屆已經密謀出選嘅飲食界人士、「金茶王」比賽創辦人黃家和，近年就非常活躍廠商會活動，相信佢絕對有意染指下屆立會議席。
其實，廠商會亦流傳過由交際手腕靈活嘅副會長吳永嘉代表廠商會，但吳永嘉唔太願意，一早耍手又擰頭。而最有江湖地位嘅第一副會長陳淑玲，亦一早表明只想專心會務，做議員嘅嘢千祈唔好搞佢。反而現任會長施榮懷明年年底即卸任會長一職，呢幾年佢漸漸為人熟悉，亦成功令廠商會年輕化，到底佢會唔會轉做廠商會代表議員，據聞佢都冇閂後門，只係話第日嘅嘢無人知。
不過，如果大輝喺廠商會，咁一切都唔使變嘞。據悉廠商會中人認為大輝過去幾年表現唔錯，雖然佢不時用金句寸爆政府，但喺業界議題方面交足功課，如果佢想坐多一屆，應該冇乜人反對，但唔少人都希望佢早啲決定，以免阻住其他人接班。我哋問大輝點睇，佢就話傳聞嘅嘢無必要回應，到時就會知佢選定唔選喎！
第一手消息請下載on.cc東方互動
