政壇：區鎮樺嘆不敵地產霸權
區議員主要職責係要服務當區居民，議員辦事處當然要開正喺自己地頭先啱，不過，大埔區議員區鎮樺就反其道而行，喺離自己選區約五分鐘路程嘅屋邨開設辦事處。
區鎮樺大嘆自己原先想喺所屬選區嘅大埔中心附近商場物色舖位，但奈何商場舖位租金高昂，惟有物色鄰近房署屋邨地舖，最後以六千幾蚊租得現時位於大元邨嘅舖位，比商場舖平咗足足兩倍有多。
不過，「針無兩頭利」，平租金都要付出代價，區鎮樺話區內老人家不時投訴議辦太遠，成日要行到好遠先可以搵到佢。
佢話除咗會同居民解釋自己係地產霸權嘅受害者外，仲會鼓勵佢哋多啲用電話搵佢幫手，咁就唔使成日行嚟行去咁辛苦。
區鎮樺議辦尋日舉行開幕典禮，仲邀得黨內多名重量級人士撐場，包括立法會超級議員涂謹申。
