政壇：議員驚青唔玩哈囉喂
行政會議成員鄭耀棠同包括建仔嘅葉國謙同ＥＱ葛珮帆、富貴黨嘅鍾國斌、保險界嘅陳健波、體育及文化界嘅馬逢國、白鴿黨嘅「鐵頭仁」何俊仁同涂謹申，仲有會計界嘅梁繼昌在內等八名立法會議員，早前接受國泰航空款待豪遊法國「收機團」，引起公眾嘩然。
設計圖片
到目前為止，除咗鄭耀棠同葉國謙仲係話參加「收機團」冇問題，堅拒回水之外，多名團友已先後道歉並且認同回水，捐款畀一啲慈善機構或志願機構，而ＥＱ日前亦話本來想將機票差價畀番國泰，點知國泰拒收，到依家究竟捐畀邊個機構，佢都未有頭緒，總之想捐畀同航空業有關嘅機構喎！當大家都以為風波應該暫告一段落喇，但據悉事件仍有餘波，連累其他議員喺今年萬聖節無得免費去迪士尼玩「哈囉喂」，呢班豪遊法國九男女真係抵打！
果籃都唔敢收
迪士尼樂園喺舊年萬聖節，邀請多達十六名議員到主題樂園公園體驗黑色世界，活動設有晚宴，又畀參加者到場內玩鬼屋同提供免費泊車。不過，自豪遊法國「收機團」風波曝光後，議員對任何商業機構嘅贊助款待都相當小心，有人更連每年中秋節前都會收到嘅月餅券同果籃都唔敢收。其中資訊科技界議員莫乃光更喺事隔大半年後，為自己舊年獲邀到迪士尼玩補做申報，可見佢哋依家幾咁驚青。唉！呢啲咪叫做早知今日，何必當初呢。
有人近日收到風，指迪士尼決定下個月唔再邀請議員試玩哈囉喂活動，難免令人聯想係同豪遊法國「收機團」風波有關。迪士尼樂園發言人接受查詢時就強調，佢哋今年本來就無計劃舉辦有關活動，同豪遊法國「收機團」無關喎！
