發霉龜苓膏照賣 懶散糊塗官失職

呢單龜苓膏事件係由兩段網上短片引爆嘅，畫面顯示有人將一盅盅已經發霉、表面布滿白色霉菌嘅龜苓膏放喺水喉下沖洗，然後用海綿抹去表面嘅霉菌，再蓋好放入雪櫃冷藏，同時有人徒手將一杯杯膠杯龜苓膏倒入瓦盅之內，冒充貴價原盅鮮製產品。簡單啲講，兩段短片指控有人出售發霉及以次充好嘅龜苓膏。而有關龜苓膏店則否認全部指控，暗指遭人設局陷害，已向惠州警方報案。

即係咁，嘢唔可以亂講，更加唔可以亂食。龜苓膏係傳統民間藥膳，近年更加成為唔少女士排毒養顏嘅獨門秘方添，依家龜苓膏唔止滋陰養顏，仲被指滋霉養菌，市民梗係聽到都怕怕啦。更匪夷所思嘅係，有學者化驗過出事品牌嘅龜苓膏四個樣本，其中三個被驗出完全冇龜板成分，其餘一個樣本亦只含極微量，學者形容「同食涼粉冇分別」，問你服未！

龜苓膏事件愈搞愈大鑊，港產官僚亦唔敢龜縮。食衞局局長高永文話喎，非常關注事件，食物安全中心有需要時會喺市面抽樣化驗，又話食安中心喺恒常食物檢驗之中，從未喺龜苓膏樣本中驗出問題喎。

咁就奇嘞，如果發霉龜苓膏指控係真嘅，而食安中心又檢測唔出嚟，咁說明乜嘢問題呢？說明指控子虛烏有？說明發霉龜苓膏無問題？定係說明當局把關粗疏呀？係人都知，港府嘅食物檢測機制早就變成一件發霉物體，孔雀石綠、蘇丹紅、三聚氰胺、塑化劑……有邊次唔係長驅直入，搞到港人提心吊膽？雖然話民以食為憂啫，大家唔想連食龜苓膏前都要食定驚風散囉。

仲有呀，學者一驗就驗出龜苓膏「無龜」，當局反而渾渾噩噩後知後覺，已經係失職兼失敗啦，叮！

咁講啦，無論發霉龜苓膏係咪真有其事，當局都要速速做嘢，挽回市民對食品安全嘅信心，須知道如果連著名連鎖店都靠唔住，市民真係隨時無啖好食o架。尤其近年內地黑心食品氾濫成災，官老爺一不留神，港人隨時中招o架，呢，海關最近破獲一宗兜售冒牌月餅案，檢獲百幾盒冒牌雙黃白蓮蓉月餅，證明香港嘅問題食品無處不在。

話時話，內地貪官奸商多如繁星，香港懶散官僚汗牛充棟，如果佢哋都好似霉菌咁被水一沖就散失，咁就一天光晒咯，叮！