城中鏡：馬蔚華睇淡內企「走出去」
招商銀行前行長、永隆銀行董事長馬蔚華，近日喺達沃斯論壇嘅講話題材真係好醒神，繼日前評論內地若實行利率市場化，將令內銀盈利大打折扣之後，尋日仲幫「走出去」嘅內企占卜，話失敗機會大，失敗率係全球第一，講得咁坦白，已經「走出去」嘅內企，會唔會腳震？
馬蔚華話內企「走出去」失敗機會大。（資料圖片）
佢講呢個題材，似乎有晒數據backup，佢話中國企業「走出去」，現時失敗率比較高，二○一○年失敗率更全球第一，超過百分之十，收購效益亦較低，超過百分之二十虧損，現時中國企業跨國經營指數只達百分之十四，遠低於美國的超過百分之四十。
中國企業嘅問題其實大家心裏有數，但做內銀老總時梗係要派定心丸，同將前景講得好聽啲，馬蔚華放低內銀名銜之後，的確講得到肉好多。
