城中鏡：EQ欲捐機票差價補鑊
立法會議員EQ葛珮帆上月偕老公參加國泰航空嘅豪遊法國「收機團」，搞到滿城風雨，EQ更被發現提早起程、先抵德國玩一周再轉飛法國，兩人四張機票由國泰埋單，其後佢「跪低」，承諾會向國泰補番德國飛法國嗰程機票，事態發展一直未明。
葛珮帆話會將機票差價捐畀同航空業有關嘅機構。（資料圖片）
原來最新發展係國泰又唔肯收番佢嘅錢，認真手尾長。
EQ透露，打算將差價捐畀有需要嘅年輕人，等佢哋可以低價參加飛行訓練計劃，但究竟有邊間機構舉辦類似課程，佢就似乎未有頭緒，總之想捐畀同航空業有關嘅機構啦。不過，EQ可能一心只係想「財散人安樂」，免得再招人話柄，但捐錢減輕年輕人「衝上雲霄」嘅經濟負擔，會唔會又令人質疑係變相幫國泰訓練機師？奉勸EQ唔好「恐慌性」捐出手頭上善款，諗過度過先決定係咪好啲呢？
