城中鏡：銀行界少林寺舊生暢聚
素有「銀行界少林寺」美譽嘅花旗香港，早前搞咗個星光熠熠嘅「舊生及銀禧職員晚宴」，唔少銀行界、政界猛人係座上客。花旗當晚向每位賓客送上一個有200年歷史嘅紙鎮，點解係200年，因為裏面有一張1813年City Bank of New York發行嘅2元美金紙幣o架!
陳子政（後排左三）、梁伯韜（後排左五）、梁錦松（前排左二）及吳克儉（前排左三）等齊出席「舊生及銀禧職員晚宴」。
聽講當晚有好多花旗集團嘅前管理層，同埋喺集團工作逾二十五年嘅現職同前任同事盛裝出席，數落都有成二百六十人，一邊歎美酒佳餚，一邊睇舊相、舊廣告片段，回味舊時美好時光。
聚首一堂當然難得，更難得嘅係好多猛人都抽時間蒲頭，「紅籌之父」梁伯韜就係其中一位座上客，○六年離開花旗時，佢已經係花旗集團投資銀行亞太區主席啦！兩位花旗集團香港區前行長梁錦松、陳子政就孖住出席，唔講唔知，佢哋喺花旗集團分別做咗二十三年同二十七年o架！不過，講到晚宴中年資最耐嘅，原來係一個喺分行工作嘅男員工，佢喺花旗做咗三十幾年o架！
聽講花旗都有邀請王冬勝，不過睇相又唔見佢嘅影蹤，話晒佢喺兩間英資大行（渣打及滙豐銀行）出任要職之前，都係喺萬國寶通銀行（花旗前稱）出身o架，睇怕王冬勝梗係太忙，所以行唔開啦！
