城中鏡：添型衣 揀靚鞋 應家柏備戰跑「馬」
香港賽馬會行政總裁應家柏（Winfried），一生都與「馬」結緣，除咗鍾意賽馬運動之外，原來仲係馬拉松長跑好手。Winfried年輕時喺德國做過職業足球員，跑十公里馬拉松可謂冇難度。
應家柏（右）同太太Winnie買運動用品，備戰馬拉松賽事。
應家柏偏好色彩鮮艷嘅跑鞋。
揀埋心水運動衫後，爽快畀錢。
日前下晝五點半鐘見到一身藍色西裝嘅Winfried，同太太Winnie孖住行入金鐘太古廣場一間運動用品專賣店，店員上前熱情招呼。此時應家柏已經急不及待走到跑鞋貨架前，拎起顏色鮮艷嘅跑鞋逐一研究，之後又要求試着，感受吓對鞋嘅舒適度，Winnie就喺側邊不時畀意見。揀定心水跑鞋之後，Winfried不忘揀番件型仔「戰衣」，最後滿載而歸。
同世界紀錄差六分鐘
我哋上前同Winfried打招呼，佢話正打算報名參加明年初嘅渣打馬拉松十公里賽事，依家已經要開始備戰，所以買定跑鞋同「戰衣」操fit自己。咦，真係一副戰鬥格咁喎！佢自爆話當年做職業足球員時參加十公里賽事，曾做出三十二分鐘嘅最佳紀錄，同世界紀錄保持者嘅二十六分鐘，只係相差六分鐘，認真犀利。
Winfried又笑言，雖然依家年紀大咗，體能冇以前咁好，但依然定期操練，務求保持喺四十六分鐘內完成十公里嘅水平。咁都未夠，佢話嚟緊目標係參加「半馬」，希望喺一小時四十五分鐘內完成二十一公里賽程喎。
