貪湯某次外訪歎盡之後，返到香港對住老廉班手足頤指氣使，大放厥詞。一班可憐嘅老廉人，為咗伺機揮低呢隻世紀大貪蟲，惟有（扮）洗耳恭聽。但見貪湯擺晒領導人款，充滿暗示地說：「我去深山參觀一條火把村，村民慣咗用火把送禮……」貪湯邊講邊磨拳擦掌，仲連口水都流埋，「受歡迎嘅首領門口擺滿燒旺晒嘅火把，上面掛住鷹形雕刻、牌匾，仲有民族禮餅！外脆內軟，好味到呢……」老廉人面面相覷，輕按褲頭荷包，面有難色。突然，有條友指住電視大叫，「Oh老細，你間屋外面好多火喎！」貪湯輕瞄螢幕，喜上眉梢，「哈哈！大家啲禮物好快手！等我拎埋張報數單，大家一齊擦餐勁！」豈料有人大叫：「你睇清楚啲先啦！新聞標題寫住『民怨谷爆　火燒貪官屋』呀！」

第一手消息請下載on.cc東方互動iPhone/iPad/Android/Windows Phone Apps