政壇：類似法院監獄顏色 貪曾信風水愛灰牆
「貪曾」前特首曾蔭權爵士任內政績欠奉，衰嘢同揮霍公帑就街知巷聞，而佢篤信風水亦係公開嘅秘密。據聞貪曾入住禮賓府之前，有傳佢搵過風水師傅睇風水格局。有知情人士爆料話貪曾入住禮賓府後，就要求將禮賓府外牆塗上灰色，同現任特首選用嘅白色外牆好唔同，究竟當中有乜玄機呢？莫非貪曾鍾意灰色地帶？
設計圖片及對白
希望收斂臭脾氣
堪輿學家李丞責話灰色本身係「靜色」，屬於隱藏顏色，係用咗會令人收斂脾氣，比較安靜啲，事實上法院、監獄等都係較多用呢種顏色。至於白色就較為樸素，白璧無瑕，但「容易有瑕疵」，所以主人希望做到公正嚴明，有所承擔喎。
李師傅真係一矢中的，大家都知貪曾出晒名小器兼臭脾氣，選用灰色撳住啲臭脾氣，希望有所收斂，真係夾到絕。再者，灰色巧合地同法院、監獄等外牆顏色類同，呢方面或者有啟示都未定。眾所周知，貪曾任期末貪盡海陸空、歎盡省港澳，如今廉政公署調查已接近完成，莫非冥冥之中有主宰，貪曾要適應定生活喺灰色嘅環境？
