政壇：中總楊釗反駁癌細胞論
就因為發展局局長「波波」陳茂波早幾日嘅一篇網誌，被質疑有意打郊野公園土地嘅主意，連被視為「梁粉」嘅天文台前台長林超英，亦形容徵用郊野公園起樓係「思想癌細胞」、「諗都唔可以諗」。不過，中華總商會會長楊釗就另有高見，佢指出一般人身體都有抵抗力，就算平時食嘢有細菌落肚都唔會有事喎。唔通楊釗覺得郊野公園少咗，香港人都冇事？
楊釗認同只要開發百分之一嘅郊野公園，就可解決住屋問題。
楊釗引用政務司司長林鄭月娥早前提出，只要開發本港百分之一嘅土地，已可建屋容納一百萬人，認為百分之一只係好細嘅數字，「對環境影響唔係好犀利啫！」但已可解決香港住屋難題，年輕人易啲上車、劏房又少啲，港人只不過「享受少一啲」，相信有足夠抵抗力撐住，更反諷林超英嘅「癌細胞」係咩道理？佢又申報利益，話自己一樣鍾意行山，但都希望大家唔好一開始就對議題講「NO」喎!
