政壇：泛民區會清算葉國謙
中西區區議員「阿謙」葉國謙舊年成功連任立法會區議會功能界別，令區議會屬於「少數族裔」嘅泛民主派議員相當唔忿氣，尋日阿謙以界別代表身份列席葵青區議會大會，結果遭泛民區議員「柴台」。白鴿黨林立志櫈都未坐暖就向阿謙兜口兜面宣讀「葉國謙不代表我」嘅聲明，隨即同十三位泛民兄弟拉大隊離席抗議，仲差啲搞到流會，因乜解救咁猛火？
設計圖片及對白
想津貼外訪難過登天
根據林立志即日上載社交網站嘅聲明，係同抗議阿謙去年自動當選區議會功能界別議員時嘅聲明差唔多，聲明除咗強調自己冇投過票畀阿謙，又批評佢喺上屆區議會提出多項參選政綱，好似「爭取更多區議員為法定組織及諮詢架構成員」、「爭取區議員開設辦事處津貼由十萬元，升至十二萬元」，全部都係「空廢的諾言」，完全冇「成功爭取」過。
林立志向我哋提起呢件事依然好扯火，佢形容區議員依家仲衰過「冇牙老虎」，「人哋根本唔當我哋區議員係老虎」，好似政府當局照抄向立法會提交嘅書面答覆再轉發區議會，就當回應咗區議會質詢。林立志慨嘆，佢哋都想爭氣，唔想區議員同「蛇齋餅糉」畫上等號，或者被市民覺得佢哋好似旅行社咁淨係識搞旅行團，但阿謙當選一年，區議員弱勢依然持續，仲係未能谷底反彈，遲早將佢哋班「區佬」逼上梁山。
回顧阿謙過去一年「政績」，好似佢極力爭取區議員外訪津貼，但上月帶埋個女參加國泰航空嘅法國豪華「收機團」，回港後仲恃住自己循區議會功能界別當選，建制派「自己友」數夠票就過骨，同行政會議成員鄭耀棠一齊死唔認錯、堅拒回水。呢次風波勢必收緊立法會議員外訪規矩，區議員想獲津貼外訪就更加難過登天。
