莫道少年不識愁 廉政敗壞令人憂
有話「少年不識愁滋味，為賦新詞強說愁」，依家冇呢支歌仔唱嘞，歷經七年「蔭權之亂」，小市民水深火熱無人理，當權者一味掛住同富豪勾勾搭搭，紙醉金迷貪婪腐敗，年輕人覺得社會不公不義不廉不潔，睇唔到希望，見唔到未來，真係想唔愁都幾難。
呢，有見前特首曾蔭權爵士同前廉政專員湯顯明貪腐醜聞影響惡劣，教育學院專登訪問咗五百名十五至三十四歲香港市民，了解佢哋對現時社會貪污情況嘅意見。結果發現，超過三成半受訪青少年認為對比九七回歸前，香港社會嘅貪污現象嚴重或非常嚴重。與此同時，超過兩成受訪者對公務員廉潔沒有信心，對問責官員廉潔沒有信心或非常沒有信心嘅比例更加超過四成，以十分為滿分，一分為最低分計，兩者嘅廉潔評分只得五點三六同四點二一分。
簡而言之，全拜「絕代雙貪」所賜，香港廉潔形象連環插水，搞到年輕一代信心盡失。回歸前後，兩個世界，由側面印證港人治港嘅失敗，令人唏噓不已！
究竟絕代雙貪腐敗到邊個地步？大致上可以概括成「前腐後繼，醜聞不絕」八個字！呢，貪曾「貪遍省港澳，歎盡海陸空」已經街知巷聞，貪湯「茅台換政協」嘅事迹亦都不堪再提，最近又有人踢爆，原來貪曾任內頻頻北上，擸埋唔少內地政府同企業送嘅禮物，最經典係有次率團到訪珠三角某工廠，獲贈全廠最新最貴嘅電飯煲做紀念品，點知曾蔭權爵士貪得無厭，竟然當堂爆出一句「我屋企要用兩個電飯煲」喎，堂堂特首面皮厚到呢個程度，引起全場側目，隨團港商都話羞家到想搵窿捐。
奇怪嘅係，面對呢兩隻罪證確鑿、人人喊打嘅過街老鼠，廉署調查拖泥帶水，到今時今日都未有下文。難怪調查顯示，雖然大部分青少年表示會舉報貪污，但只有不足一半認為廉署能夠有效解決香港貪污情況，接近四成認為未來五年嘅情況會變得更嚴重。面對嫉惡如仇嘅青少年，肅貪不力嘅港產官僚除咗感到後生可畏，仲應該自慚形穢。
計太一叮話齋，港產官僚自慚形穢都冇用嘅，排憂解難嘅正路在於盡快拎起狗頭鍘，將貪官污吏繩之以法，尤其刑事檢控專員楊家雄新官上任三把火，好應該將火頭點向絕代雙貪，同廉署合演一齣「打大老虎」嘅好戲。唔係嘅話，廉政公署遲早淪為貪政私署，香港隨時變成與內地同流合污嘅腐敗之城，一國兩制遲早玩完，叮！
