城中鏡：許漢忠換Look 潮戴新眼鏡
「潮」唔係年輕人嘅專利，年過六十歲嘅機場管理局行政總裁許漢忠都一樣「潮」得起。日前一個下晝近三點喺金鐘海富中心見到佢一支公現身一間眼鏡店，試戴新款眼鏡。當時許漢忠急不及待脫下原來嘅橢圓形金屬框眼鏡，換上流行嘅方形黑色膠框眼鏡，睇落即時後生咗同有型咗，難怪佢自己睇到都忍唔住笑起來。
變身前
變身後
當日佢一步入眼鏡店，兩名店員即時好熱情咁同佢打招呼，仲傾到搭晒膊頭，好明顯係熟客。店員招呼許漢忠坐低，隨即取出一副已配好鏡片嘅黑色膠框眼鏡，畀佢試戴感受吓舒唔舒適。
醫白內障順便矯視
佢戴上新眼鏡好認真咁試，一對手輪流掩住左右眼測試鏡片清晰度，又轉身望向店外遠處，睇吓副眼鏡啱唔啱度數。
試戴一輪之後，許漢忠笑笑口咁向店員表示滿意，然後將新眼鏡放進口袋，取回原來嘅金屬眼鏡戴上，與店員道別離開。許漢忠話早前發現雙眼患上白內障，於是安排做眼部手術，順便將本來嘅五百多度近視矯正，來個一石二鳥。佢話做完手術後將會連近視都醫好埋，所以要配定副新眼鏡備用喎。話唔定，佢可能係想順便幫自己轉新形象至真。
