香港廢柴政府發展局局長囤地波龜縮咗個幾月，見特首安排狙擊林老師的突襲行動有點成效，以為大眾已唔再記得佢涉嫌違規之糗事，兼姣婆守唔得寡的衝動，便學特首做鍵盤戰士，為未來政策放風，以備將來被人問起時，咪話「早已作過諮詢」囉！

劏房醉駕囤地波喺「局長隨筆」嘅網誌話：「全港有逾七成土地是郊野公園……面對大量市民居住的需要下，」佢態度囂爆的問：「是否全都不能碰、不能發展呢？」仲寸到話：「發展郊野公園過往會被視為禁區，甚至禁忌，今天又是否完全不可碰、不可談呢？」呵呵！惡言廢話一出，即四方八面劣評如潮，狂插狂爆佢，首先佢唔知碇，本港只約四成土地屬郊野公園，唔係佢所講的七成；隨後，發展局急出聲明，卸膊指囤地波所講係引述座談會上出席者的意見，並非政府立場！

真跳海，一個局長仲衰過維園阿伯，信口開河，噏得就噏，唔經大腦。我不禁要問，點解一個局長喺自家「局長隨筆」可以隨便豬噏就得，一個老師則二十四小時都唔可以「下班」，不許脫下教師制服，講自己要講嘅嘢？特首應否派重案組去查吓囤地波？或叫佢頂頭老細林鄭交個報告睇吓呢？

香港廢柴政府近日癲到失晒常，竟鬼鬼祟祟安排咗那個最叻講Sorry嘅前差頭鄧竟成做「郊野公園及海岸公園委員會主席」，當被坊眾質疑佢毫無環境保育知識時，林鄭月娥保住佢話：「主席並非要係專家！」特首話：「需要不同背景人士，平衡各方意見。」鄧竟成回應最堅，佢話：「我係以用家身份參與的！我並非毫無相關經驗o架！因我經常行山嘅！」吓！那個同時被拉返差館嘅露械狂都係警署用家，仲出入唔少經驗啦！咪要畀佢做署長？「香港，死未？」

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東方互動iPhone/iPad/Android/Windows Phone Apps