政壇：搞搞政：黑英插波波有思想癌細胞
尋日都講過發展局局長「波波」陳茂波，日前喺網誌撰文為發展郊野公園試水溫，點知畀環團抨擊，仲踢爆佢將郊野公園佔地由四成「發水」至七成單嘢，卒之係發展局出稿澄清，而佢就變咗「波縮」，一直冇現身解畫。被視為「梁粉」嘅天文台前台長「黑英」林超英睇唔過眼，鬧爆波波嘅言論係「思想癌細胞」、「諗都唔好諗」，又話假如市民今日讓一寸，明日就要讓一尺甚至一丈，擺明阻止波波嘅「思想癌細胞」擴散。
設計圖片及對白
黑英舊年幫特首CY梁振英撰寫環保政綱，競選期間又為CY站台，自然被歸類為「梁粉」，但發展郊野公園呢類惹火議題，自然觸碰到「環保戰士」黑英嘅神經，尋日一於開咪大戰「鍵盤戰士」波波，黑英一坐低就先指正波波嘅「七成」郊野公園論。
眾所周知，黑英愛花鳥蟲魚如命，佢先力銷郊野公園係港人引以為傲嘅珍貴資源，連外國人發夢都諗唔到三十分鐘車程就可以穿越繁忙鬧市，一覽「山懷抱住海、海懷抱住山」嘅美景，批評政府過去「個海就填咗佢，啲魚就唔使睬佢」，專搞啲花鳥樹木、唔識講嘢嘅郊野公園，有人嘅地方就唔敢掂。
講講吓，黑英更警告香港嘅山脊同風水已開始爛，政府唔應該自毀長城，仲發展局局長上身，建議開發棕土（brownfield sites）、好似天水圍以西一帶嘅貨櫃場呢類已經「搞爛咗嘅鄉郊土地」。面對大是大非嘅環保議題，黑英話知自己係咩粉，一於落足子彈開火，邊個都冇面畀。
