政壇：西貢區23議員譴責哪吒
雖然泛民主派同建制派喺政治立場上南轅北轍，但尋日卻罕有地站在同一陣線，來自跨黨派合共二十三名西貢區議員，提出動議譴責獨立議員「哪吒」方國珊喺未經合法申請下街頭籌款，嚴重影響區議會嘅聲譽同公信力，但因哪吒尋日唔在場暫未就動議表決。根據有關聯署譴責聲明內容，指警方亦正式就上述投訴展開調查。
哪吒（右二）同示威者早前到西貢區議會門外抗議環境局局長黃錦星。（資料圖片）
哪吒否認非法籌款
西貢區議會本身共有二十九名議員，撇除主席吳仕福，有超過八成嘅二十三名跨黨派議員，包括民主黨、新民主同盟、民建聯、工聯會以及公民力量等五大政黨政團，聯署譴責哪吒違反區議員操守指引，無聯署嘅有五人，包括曾經同哪吒一同反對擴建將軍澳堆填區嘅陳繼偉。
有熟悉議事規則人士話，由於今次聯署譴責僅限於區議會，若發生在立法會，只要有三分二議員通過譴責就會喪失議席。另外，跨黨派二十多名西貢區議員發新聞稿，講述上周五同環境局局長黃錦星會面情況，指哪吒當日「不斷鼓動示威者」，擔心哪吒同示威者進入會議室，會面必被打斷或要腰斬，希望哪吒自我反省。不過，哪吒否認非法籌款，只係有段時間進行「預先推廣」，強調已跟足程序辦事，但在申請籌款牌照過程上遭人留難，若因此造成任何誤會，表示歉意。佢又否認被指鼓動示威者嘅指控，強調指控與事實不符。
今年初，西貢民政事務專員蕭慕蓮亦曾罕有發信，以強硬字眼遺憾哪吒違規周街亂掛宣傳橫額，以及安排支持者同助理大鬧區議會，當時哪吒反指專員政治打壓。
