設計圖片及對白
今屆政府官員鍾意做「鍵盤戰士」寫網誌多過見人，以為喺網上發表高見，無咁易講錯嘢，但係事實係咪咁，大家有目共睹，好似發展局局長陳茂波話發展郊野公園，就鬧得滿城風雨。我哋尋日又發現運輸及房屋局常任秘書長（房屋）兼房屋署署長栢志高寫咗篇網誌，話起公屋絕不應走捷徑，或者做有損質素同工作安全嘅事，似乎若有所指。
政府九七年提出八萬五建屋鴻圖大計，每年要起五萬個公營房屋單位，房署為咗達標，搏命咁起樓，根本超出負荷，最終被不法之徒有機可乘，搞出公屋短樁醜聞。話口未完，到特首梁振英上場，又話要縮短起公屋時間，又推長遠房屋策略諮詢文件，建議未來十年要供應四十七萬個單位，當中公營房屋佔六成，即係每年要起二萬八千幾個。
暗示好多嘢急唔嚟
栢志高可能有感而發，尋日以「供應優質穩妥的房屋」為題發表網誌，先講講自己近日出席咗一個慈善機構嘅周年大會，突然有所感悟︰「縱然世上有些人較為依賴，渴望他人協助排難解困，同時又抱怨現況；猶幸不乏熱心人士，竭力幫助社會上不幸、貧困、弱勢和病患的人。」
佢又話明白同事面對嘅壓力與日俱增，不單要喺短時間之內增建單位，仲要處理複雜嘅地盤狀況、地區人士反對以及政治爭議，「我想強調︰我們絕不應走捷徑，或做有損質素和工作安全的事；應以我們對社區所做的工作、所提供的服務為榮。大家別忘記︰公營房屋計劃讓數以百萬人士和家庭脫離貧困，令社會更趨繁榮。」
即使長策嘅建屋目標，比起八萬五時少好多，但栢志高都暗示，好多嘢急唔嚟，如果唔係就會有所犧牲咁話。
第一手消息請下載on.cc東方互動
