通常話一個人吊鹽水，即係危危乎，唔撐得幾耐。估唔到內地同胞竟然有一鋪吊鹽水癮，係又吊唔係又吊，你吊佢吊齊齊吊，令中國成為全球第一吊鹽水大國，唔知究竟係可笑定可悲！

吊鹽水喺內地叫輸液，又叫吊瓶同打點滴，無論點叫都好，都唔能夠改變一個事實，就係說話可以亂講，藥唔可以亂食，鹽水更加唔可以亂吊，理論上只有情況嚴重嘅病人先至需要。不過，喺光怪陸離、無奇不有嘅神州，講理論係冇用嘅，講錢最實際。呢，吊鹽水居然成為醫生診症嘅必備處方，無論傷風感冒，頭暈身慶，一律吊之哉，唔到你唔服。

唔係講笑，中國經濟大國嘅稱號被人批評虛有其表，但係吊鹽水大國嘅銜頭就當之無愧嘞。內地傳媒踢爆，二○一一年中國總共消耗咗一百億瓶鹽水，即係十三億人平均每人吊鹽水八瓶，遠高於國際人均二點五至三點三瓶嘅水平，問你怕未。

大家咪以為吊鹽水係小問題，最多浪費醫療資源啫，其實亂吊鹽水隨時攞命。業界統計顯示，內地每年因為不安全注射導致死亡嘅人數超過三十九萬，估計其中最少有十萬人喺吊鹽水後死亡，輸液變輸命，何必呢。退一步講，亂吊鹽水就算保住條命，亦可能令身體產生耐藥性，對藥物反應喺不知不覺中一點一滴流失，嚴重嘅甚至仲會衍生「重症感染無藥可用」後遺症添，後果可大可小o架！

既然亂吊鹽水咁危險，點解內地醫生仲猛向病人開藥呢？唉，咪因為醫療腐敗囉。醫院同醫生向病人處方吊鹽水，比開口服藥嘅回佣更多，見錢開眼咯喎，咪將病人當人肉提款機囉。

叮佢個鎯鎯，內地黃綠醫生究竟仲有冇醫德o架？明知亂吊鹽水對病人有害，仲猛向病人推介，講得好聽啲叫唯利是圖，講得唔好聽根本就係草菅人命。古人話，醫者父母心，可惜今日內地醫者只講金唔講心，連病人嘅生命健康都可以置之不顧，你話佢哋仲有乜嘢醫德可言吖！

中醫睇病要望聞問切，內地吊鹽水奇觀其實就係中國社會病入膏肓嘅縮影。當今道德淪喪，人人唯利是圖，做官係咁，做生意係咁，連做醫生嘅都係咁，一個咁嘅社會遲早死得啦。香港人話吊鹽水即係吊命咁解，家陣全中國人人吊緊鹽水，唔通意味着成個民族已經危危乎？唔怪得國歌都有得唱，「中華民族到了最危險的時候」，真係冇講錯，叮！

第一手消息請下載on.cc東方互動iPhone/iPad/Android/Windows Phone Apps