身為警察部阿頭，呢件曾偉雄嘅物體，若非阿公吹雞，要佢阿頭保安局局長黎棟國牽繩帶晒香港特區所有紀律部隊首長面聖，呢條曾偉雄失蹤於香港媒體足足半年。吖!上一次見報，係幾時呢？為乜見報呢？真係諗爆頭也記不起了！

近幾個月，香港治安大亂，遠的，大家唔係好記得啦！淨係六月尾，青關會揮摺櫈打傷參加悼念李旺陽的途人、七月十四日林慧思老師事件、到八月四號休假差人與幾千市民在滿布金舖的西洋菜街互罵對壘，甚至特首落區到天水圍被黑幫公然鬧事郁友，都不見禿鷹嘅黑影！吖！仲漏咗特首到觀塘做騷，出動全港警力三分一，仍不見曾處長蹤迹！(目及)緊幾廿萬公帑的伙記，可以「玩失蹤」，差啲要出「窩輪」緝人，或喺啲燈柱邊貼「尋失」啟事！幸好！曾處長聽話聽教，一話有國家領導人會面，立即蒲頭，否則，大家以為佢「不在人世」添噃！

哈！呢日，有獎攞，又見佢出嚟同黎明爭爆金句，佢話戴唔同嘅有色眼鏡，就會睇到唔同顏色喎！咁！你個頭頂帽乜嘢色吖？我雖然戴住綠色鏡片，但，我仍覺得係「紅色」嗰囉！（你放心啦！我一定好平常心客觀嘅！）

一個部門阿頭，係好影響外界的觀感和評分的！今劑，警務處只得「最佳公眾形象獎」之銀獎，即「形象」唔係最好囉！禿鷹仲沾沾自喜，惡形惡相寸記者，唔通上星期面聖獲得寵幸嘉許，有新任務工作，喜不自勝？定係再有恃無恐，可勇武向前，做個盡責好公安？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps