城中鏡：沙田馬場 溫馨滿瀉
新馬季尋日開鑼，唔少名人急不及待入沙田馬場攞番個頭彩。女童軍香港總監彭徐美雲、老公彭曉明同囝囝Victor彭穎生共同擁有嘅愛駒「羅馬神駒」尋日都有出賽，彭太扮到靚一靚等拉頭馬，愛駒亦不負眾望勝出，帶挈佢哋贏得四十一萬多元獎金。
趣致可愛嘅陳頌言（左）一出場就成為全場焦點，爸爸陳振邦（中）同媽媽郭詩慧都錫到佢燶。
彭徐美雲（中）愛駒贏馬，老公彭曉明（右）同囝囝彭穎生都好興奮。
黃業光（中）細女愷欣（左二）尋日牛一，太太吳曉婷（右二）、大女愷珊（右一）同細仔愷俊（左一）齊齊入場慶祝。
彭太話愛駒喺上個馬季煞科日跑第三，當時佢身在日本開會，Victor惟有致電向佢報喜，佢聞訊後即刻買新衫慶祝，尋日佢着住新買嘅彩色花裙為愛駒打氣，結果就贏咗，認真當旺。彭太已非首次喺開鑼賽贏馬，佢哋已退役嘅愛駒「同歡笑」，亦曾於開鑼日奪冠。
莎莎國際主席Simon郭少明亦鴻運當頭，佢隻靚駒「美麗昇華」以大熱姿態跑出，袋走近八十萬元獎金。Simon舉家現身拉頭馬，人見人愛嘅乖孫Jacob陳頌言一出場就搶晒公公鏡，個個爭住同佢玩，後來Jacob可能怕生保，喺爸爸陳振邦懷中扭計，要媽媽郭詩慧出辦法氹番。
東華三院總理John黃業光、太太吳曉婷、大女愷珊、細女愷欣同孻仔愷俊一家五口溫馨現身，為佢有份擁有嘅團體馬「赤驥」打氣，可惜愛駒首度出賽欠缺經驗，最終三甲不入。阿John話其實尋日咁啱係愷欣生日，所以舉家入場食飯為愛女慶祝。
