政壇：搞搞政：張文韜官場失意玩失蹤
政府對於政治人才求才若渴，建制派每隔一段時間都會推薦成員加入。經過熱廚房嘅考驗後，個別可以「升呢」上位，亦有人倒番轉頭參選立法會兼成功當選，但呢啲只係個別嘅例子，唔係個個加入政府嘅仕途都一帆風順，好似同樣嚟自建仔嘅發展局前政治助理張文韜，舊年六月底離開政府後就喺政壇銷聲匿迹，真係同人唔同命。
設計圖片及對白
張文韜喺上屆政府跟住「好打得」嘅發展局前局長林鄭月娥做嘢，理應有大把機會學嘢，林鄭之後更上一層樓喺新政府出任政務司司長，但張文韜不但冇得拉衫尾「升呢」做副局長，反而不獲續任黯然離開官場。舊年九月立法會選舉前夕，有人重提部署張文韜落戶九龍西直選，黨內旋即有強烈反彈聲音，最後佢連排喺蔣麗芸名單嘅資格都冇埋，依家既非建仔中委亦非區議員。
張文韜落得如斯下場，有人話係因為佢為官期間鮮有同建仔中人打交道。有建仔中人就以張文韜「升呢」失敗做例子，提醒依家喺政府做緊官嘅黨員，要好好把握呢幾年為官嘅寶貴機會，兼且切忌忘本，否則將來落任時隨時會變成「張文韜二世」，政治前途從此玩完。
